ތުއްތު ތުއްތު މަންހާގެ އުއްމީދު ހާސިލްކޮށްދެމާ ހިނގާށެވެ.

އިންސާނީ ފިޠުރަތުގެ މަތިން، މަންމަގެ ބަނޑުގައި އޮވެ، އެ މަންމަ ކެތްތެރިކަމާއިއެކު އެ ފުރާނަ ދެލޮލުން ދެކިލާ، އެ ކުޑަކުޑަ ހަށިގަނޑުގައި ފިރުމާލުމުގެ އުފާވެރި އުއްމީދުގައި ވަނިކޮށް މަންހާ މިދުނިޔެ އަށް ފުރަތަމަ ނޭވާލީ އެ ޢާއިލާގެ ހަމަ ކޮންމެ މެމްބަރަކަށްވެސް އުފާވެރިކަމާއި ހިނިތުން ގެނުވައިދީފައެވެ. ނަމަވެސް ތަދުބީރުކުރިގޮތުން އެންމެ ޅަދުވަހުން ފެށިގެން މަންހާ އަށް ކުރިމަތިލާން ޖެހިފައިވަނީ ދުނިޔޭގެ ބޮޑު އިމްތިހާނަކާ އެވެ. އުފަންވުމުގައި ހުރި ނުކުޅެދުންތެރިކަމެއްގެ ސަބަބުން މި ދުނިޔޭގެ ދުވަސްތައް ވޭތުކުރުމަށްޓަކައި މަންހާ އަށް އަޅުގަނޑުމެންގެ ޙާއްޞަ އެހީތެރިކާމާއި އަޅާލުން ވަނީ ބޭނުންވެފައެވެ. ހަމައެކަނި ރޮއިލުމުގެ އަޑު ފިޔަވާ އެހެން އެއްވެސް އަޑެއް މަންހާގެ ދުލުން މިއަދު ބޭރުނުވިޔަސް، އެ ތުއްތު ތުއްތު މަންހާ މިއަދު ތިބާގެ އެހީތިކަމަށްޓަކައި އާދޭސް ކުރާކަހަލައެވެ.

ޏ.ފުވައްމުލަކު، ނަވާޒުހައުސް، ޙަސަން ސައީދުގެ ދެމަފިރިންގެ އަލަތު ދަރިފުޅު ފާތިމަތު މަންހާ ސައީދު އަކީ ދުނިޔެ އަށް އުފަންވިއިރު ވެސް ބަލި ކުއްޖެކެވެ. ލިވަރ އަށް ދިމާވެފައިވާ މައްސަލައެއްގެ ސަބަބުން މަރާއި ހަނގުރާމަކުރަމުންދާ ލޯބި ލޯބި ތުއްތު ކުއްޖެކެވެ. އުމުރުން 11 މަހުގެ މަންހާއަކީ އުފަންވީއިރު ލިވަރ އިން ކުޑަ ގޮހޮރަށް ބައިލް ދާ ހޮޅިބެދިފައި ހުރުމުގެ ސަބަބުން އެކަމުގެ ފަރުވާއަށް ބޭނުންވެފައިވާ ކުއްޖެކެވެ. އެގޮތުން އުފަންވިތާ 20 ވަނަ ދުވަހު މަންހާ އޮޕަރޭޝަނެއް ކުރިއެވެ. އަދި އޭގެ ފަހުން ލޭގައި ޖަރާސީމު އުފެދިފައި ހުރުމުން އިންޑިއާ އަށް ގެންގޮސް އެކިފަހަރު މަތިން ވަނީ މަންހާ އަށް ފަރުވާ ދެވިފައެވެ. ނަމަވެސް މަންހާގެ ލިވަރ އަށް ދިމާވެފައިވާ ސީރިއަސް މައްސަލަ އަށް އަދިވެސް ވަނީ އެކަށީގެންވާ ފަރުވާއެއް ނުކުރެވިއެވެ. އަދި ފަރުވާ ނުލިބި ދުވަސްވަމުން ދާތީ މަންހާގެ ލިވަރ ހަލާކުވެ، ފުރާނައަށް ނުރައްކާވާ ހިސާބަށް ވަނީ ގޮސްފައެވެ.

މަންހާގެ ފުރާނަ ސަލާމަތްކޮށް، އެ ތުއްތު ދަރިފުޅުގެ ދިރިހުރުމަށްޓަކައި މިއަދު ބޭނުންވަނީ ބޮޑު އޮޕަރޭޝަނެކެވެ. އެގޮތުން އިންޑިއާގެ ޓްރާންސްޕްލާންޓް ހެދުމަށް ޚާއްސަ ހޮސްޕިޓަލެއްކަމުގައިވާ ގްލޯބަލް ހޮސްޕިޓަލްސް އެންޑް ހެލްތު ސިޓީގެ ޚާއްސަ ޑޮކްޓަރު ނަރޭޝް ޝަންމުގަމް ވަނީ ވީއެންމެ އަވަހަކަށް މަންހާގެ ޓްރާސްޕްލާންޓެއް ހެދުމަށް ލަފާދީފައެވެ. މިކަމަށްޓަކައި ވަރަށްވެސް ބޮޑު ހަރަދެއް ހިނގައެވެ. އޮޕަރޭޝަނަށާއި، އިންޑިއާގައި ތިބުމަށް ގާތްގަނޑަކަށް 43,800.00 ޔޫއެސް ޑޮލަރު (ސާޅީސް ތިންހާސް އަށްސަތޭކަ ޔޫއެސް ޑޮލަރު) ބޭނުންވެއެވެ. ދިވެހި ފައިސާ އިން ނަމަ ގާތްގަނޑަކަށް 675,400.00 ރ. (ހަލައްކަ ހަތްދިހަ ފަސްހާސް ހަތަރު ސަތޭކަ ރުފިޔާ) އެވެ. މިފަދަ ބޮޑު ޚަރަދެއް ހަމަ އެންމެ ޢާއިލާއަކުން ކުރާނީ ކިހިނެއް ހެއްޔެވެ.

"އަޅުގަނޑުމެން މިހާރު ވެސް މިތިބީ އެހީ ލިބުނުހާ އަވަހަކަށް އިންޑިއާ އަށް ގޮސް އޮޕަރޭޝަން ކުރަން ތައްޔާރަށް. މިހާރު ވެސް ނުދެވިފައި މިތިބީ މާލީ ހާލަތު އެކަމަށް ތަންނުދޭތީ. ދެފަރާތުގެ ޢާއިލާގައި ވެސް އެފަދަ ބޮޑު ޚަރަދެއް ކުރާނެ ތަނަވަސްކަމެއް ނެތް" މާޔޫސްކަމާއިއެކު މަންހާގެ ބައްޕަ ބުންޏެވެ.

އޭ އެކުވެރިންނޭވެ. މިގައުމުގެ ބައްޕައިންނާއި، މަންމައިންނޭވެ. މި ތުއްތު މަންހާއަށްޓަކައި ޤުރުބާނީއެއް ވެލައްވާށެވެ. މި ތުއްތު މަންހާގެ ފުރާނަ ސަލާމަތްކޮށް، ދުޅަހެޔޮ ސިއްހަތެއްގައި އެދަރިފުޅު ލެހެއްޓުމަށްޓަކައި މިއަދު އަޅުގަނޑުމެންގެ އެހީތެރިކަން މިވަނީ ފޯރުކޮށްދޭން ޖެހިފައެވެ. އަޅުގަނޑުމެން ފޯރުކޮށްދޭ އެހީތެރިކަމާއިއެކު މެނުވީ މަންހާގެ ބައްޔަށް ފަރުވާކުރެވޭނެ ހަމަ އެއްވެސް މަގެއްނެތެވެ. އެހެންކަމުން ހަމަ ކޮންމެ ބޭފުޅަކުވެސް މަންހާއަށް އެހީތެރިކަން ފޯރުކޮށްދޭށެވެ. މަންހާގެ ފަރުވާއަށްޓަކައި ދިއްކޮށްލާ އެންމެ ފަސްރުފިޔާ އަކީވެސް މިއަދު އެ ޢާއިލާ އަށް ރަނަށްވުރެވެސް އަގުބޮޑު އެއްޗެކެވެ. އަދި ކިތަންމެ ކުޑަ މިންވަރެއްގެ އެހީތެރިކަމެއްވެސް އެ ޢާއިލާއިން ބަލައިގަންނާނީ ޝުކުރުވެރިކަމާއި އެކުގައެވެ.

އެހީތެރިކަމާއި އަޅާލުމަށް ބެނުންވެފައިވާ ކުޑަކުޑަ މަންހާއަށްޓަކައި މިއަދު ތިބާގެ އަތުން ދޫކޮށްލެވޭ އެހީތެރިކަމުގެ ފައިސާކޮޅަކީ، ހަމަޔަޤީނުންވެސް ގެއްލިގެން ދާނެ އެއްޗެއްނޫނެވެ. އެހީތެރިކަމާއި، އޯގާތެރިކަމަށް އެދި މިއަދު އެރޮނީ ކުޑަކުޑަ މައުސޫމް ތުއްތު ތުއްތު ކުއްޖެކެވެ. މާދަމާ އެފަދަ ރިހުމުގެ އަޑަކުން ރޯލާނީ ތިބާގެ ދަރިފުޅު ނޫންކަމެއްވެސް އެނގެނީ ކިހިނެއް ހެއްޔެވެ. އެދުވަހުން ހަމަ މިގޮތަށް ތިބާވެސް އެހީތެރިކަމަށް އެދޭނެއެވެ. އާދޭސްކުރާނެއެވެ. އެހެންކަމުން މިފުރުޞަތުގެ ބޭނުންހިފާ، ތިބާގެ އެހީތެރިކަން އެތުއްތު މަންހާއަށް ފޯރުކޮށްދެމާ ހިނގާށެވެ.

ފާޠިމަތު މަންހާ ސައީދު އަށް އެހީތެރިކަން ފޯރުކޮށްދިނުމަށްޓަކައި ގުޅުއްވާނީ މަންހާގެ ބައްޕަ ޙަސަން ސައީދު (7996755) އަށެވެ. އަދި މަންހާއަށް އެހީވުމަށްޓަކައި 7703228346001 މި އެކައުޓަށް ފައިސާ ޖަމާކުރެއްވުން އެދެމެވެ. މިއީ ޙަސަން ސައީދުގެ އެކައުންޓް ނަންބަރެވެ.

"އިންސާނިއްޔަތަށްޓަކައި އަހަރެން އެހީވާނަން، މާދަމާ އަހަރެންވެސް އެހެންމީހުންގެ އެހީތެރިކަމަށް އެދެން ޖެހިދާނެ".

މަންހާގެ ޢާއިލާ ކެތްތެރިކަމާއެކު އިންތިޒާރުކުރަމުން އެދަނީ ތިބާގެ އެހީތެރިކަމަށެވެ. ވެވުނު މިންވަރަކުން މިޢާއިލާއަށް އެހީތެރިން ފޯރުކޮށްދޭށެވެ. ތުއްތު ތުއްތު މަންހާ އަށް މާތްﷲ އަވަސް ޝިފާއެއް މިންވަރުކުރައްވާށިއެވެ. އާމީން.