ޕާކިސްތާނުގެ ރައީސް އާސިފް އަލީ ޒަރުދާރީ ހިތްޕުޅުގެ އާލާސްކަންފުޅަކަށް ދުބާއީގައި ފަރުވާ ހޯއްދަވަމުން ގެންދަވާ ކަމުގައި ރަސްމީ ބައެއް ޚަބަރުތައް ބުނަން ފަށައިފިއެވެ. މިގޮތުން ޕާކިސްތާނުގެ ބޮޑުވަޒީރުގެ އޮފީހުގެ ތަރުޖަމާނު މިޚަބަރުގެ ތެދުކަން ކަށަވަރުކޮށްދީފައިވެއެވެ.
މީގެކުރިން، ޕާކިސްތާނުގެ ރައީސްގެ އޮފީހުން އާންމުކޮށްފައިވާ ޚަބަރުތައް ބުނާގޮތުގައި ރައީސް ޒަރުދާރީ އާންމު އުސޫލްގެ މަތިން ޗެކަޕެއް ހެއްދެވުމަށް ވަޑައިގެންނެވީ ކަމަށެވެ.
އެންނަމަވެސް، މިހާރުގެ ރިޕޯޓުތައް ބުނާގޮތުގައި އޭނާ ދުބާއީއަށް ވަޑައިގެންފައިވަނީ ހާޓް އެޓޭކެއް ޖެހިވަޑައިގަތުމުން، ޢާއިލާގެ އެދިވަޑައިގަތުމުގެ މަތިންނެވެ. މިޚަބަރާއި ގުޅިގެން އޭނާއަށް ރަސްމީ މަސައްކަތްތަކުގައި އުޅުއްވިދާނެތޯ ބައެއް ފަރާތްތަކުން ސުވާލު އުފައްދާފައިވެއެވެ.
ބައެއް ރިޕޯޓުތައް ބުނާގޮތުގައި ފަރުވާއަށްފަހު، މެޑިކަލް ޓެސްޓްތައް ހެއްދެވުމަށްފަހު، ސިޔާސީ ކެރިއަރުގެ ކުރިމަގާއިމެދު ގޮތެއް ނިންމެވުން ކައިރިއެވެ. އެހެންނަމަވެސް، މިހާތަނަށް އެފަދަ އެއްވެސް އިޝާރާތެއް ކުރައްވާފައެއް ނުވެއެވެ.
އެމެރިކާ އާއި ދެމެދު އުފެދިފައިވާ ތަފާތުވުންތަކާއި ގުޅިގެން މިހާތަނަށް ޕާކިސްތާނުގެ ސިޔާސަތުތައް ދަމަހައްޓަވާނެކަމަށް އަބަދުވެސް ވިދާޅުވަމުން ގެންދަވާ ރައީސް ޒަރުދާރީއަކީ ޤައުމުގައި މާބޮޑު މަޤްބޫލުކަމެއް ލިބިވަޑައިގެންފައިވާ ބޭފުޅެއް ނޫނެވެ. އެހެންނަމަވެސް، އަވަހާރަވެފައިވާ ކުރީގެ ބޮޑުވަޒީރު ބޭނަޒީރަށް އޮންނަ ތާއީދުގެ ސަބަބުން އޭނާއަށް ވެރިކަމުގައި ހުންނެވުމުގެ ފުރުޞަތު އޮތްކަމަށް ގިނަ ބަޔަކު ބުނެއެވެ.
ކޮމެންޓް (0)
ލޯޑް ކުރަމުން...