ފަލަސްޠީނުގެ ދައުލަތެއް ޤާއިމްކުރުމަށް ކުރެވޭ މަސައްކަތުގައި އދ އަދި ސަޢޫދީ ޢަރަބިއްޔާގެ އެހީތެރިކަމަށް ޢައްބާސް ޝުކުރު އަދާކުރައްވައިފި

ފަލަސްޠީނުގެ ރައީސް މަޙްމޫދު ޢައްބާސް ވަނީ އެކުވެރި ދައުލަތްތަކުގެ ޖަމްޢިއްޔާގެ ނިއުޔޯކް ޑިކްލަރޭޝަނަށް އެހީތެރިވެދެއްވި ސަޢޫދީ ޢަރަބިއްޔާ، ފްރާންސް، އދ އަދި އެހެނިހެން ބައިވެރިވި ޤައުމުތަކަށް ޝުކުރު އަދާކުރައްވައިފިއެވެ.

އދ ގެ މައި މަރުކަޒުގައި ބޭއްވުނު ފަލަސްޠީނު މައްސަލަ ސުލްޙަވެރިކަމާއެކު ޙައްލުކުރުމާއި ދެ ދައުލަތުގެ ޙައްލު ތަންފީޒުކުރުމާ ގުޅޭ މަތީ ފެންވަރުގެ ބައިނަލްއަޤްވާމީ ކޮންފަރެންސްގައި ޢައްބާސްގެ ފަރާތްޕުޅުން ކިޔައިދެވުނު ވާހަކަފުޅުގައި، "ފަލަސްޠީނު ރައްޔިތުންގެ މައްޗަށް ކުރެވޭ ހަނގުރާމަ ހުއްޓާލަން ޖެހޭކަން މި ޑިކްލަރޭޝަނުން ފާހަގަކޮށްދޭ" ކަމަށް ވިދާޅުވިއެވެ. އަދި ރައްކާތެރިކަން ހޯދުމަށް ބަނޑުހައިހޫނުކަމާއި ހަލާކުކުރުން ބޭނުންކުރުމާމެދު ކުށްވެރިކުރައްވާފައިވެއެވެ.

ކޮންފަރެންސްގެ ބައިވެރި ޗެއަރުންކަމުގައިވާ ސަޢޫދީ ޢަރަބިއްޔާ އަދި ފްރާންސްއިން ބައިނަލްއަޤްވާމީ ޝަރުޢިއްޔަތުގެ މައްޗަށް ބިނާކޮށް ދެ ދައުލަތުގެ ޙައްލަށް މަގުފަހިކުރުމަށާއި ފަލަސްޠީނު ދައުލަތް ބައިނަލްއަޤްވާމީ ގޮތުން ބަލައިގަތުމަށް ކުރި މަސައްކަތްތަކަށް ޢައްބާސް ވަނީ ޝުކުރުވެރިވެވަޑައިގެންފައެވެ.

މީގެއިތުރުން، މިޞްރު، ޤަޠަރު އަދި އެމެރިކާގެ މެދުވެރިންގެ މަސައްކަތްތައްވެސް ފާހަގަކުރައްވާ، ޣައްޒާގެ ވެރިކަން ކުރެވޭނީ ހަމައެކަނި ފަލަސްޠީނު ދައުލަތަށްކަމަށާއި، އެއީ ވެސްޓް ބޭންކްގައި ހުންނަ ފަލަސްޠީނު ސަރުކާރާ ގުޅިފައިވާ ވަގުތީ އިދާރީ ކޮމިޓީއެއްގެ ދަށުން، ޢަރަބި އަދި ބައިނަލްއަޤްވާމީ އެހީތެރިކަމާއެކުގައިކަން ޢައްބާސް ވަނީ ފާހަގަކުރައްވާފައެވެ.

ފަލަސްޠީނުގެ ޚާރިޖީ މިނިސްޓްރީން ވަނީ ނިއުޔޯކް ޑިކްލަރޭޝަނަށް ތާއީދުކޮށް، އެ ޑިކްލަރޭޝަން ތަންފީޒުކުރުމަށް ސޮއިކޮށް ބަލައިގަތުމަށް ހުރިހާ ޤައުމުތަކަށް ގޮވާލާފައެވެ. އަދި ޣައްޒާގައި އަވަސް ހުއްޓުމެއް ގެނައުމަށާއި ނިއުޔޯކް ޑިކްލަރޭޝަނާއި ބަޔާނުގައި ހިމެނޭ އެންމެހައި ކަންކަން ތަންފީޒުކުރުމަށް އިލްތިމާސްކޮށްފައިވެއެވެ.