ހުކުރު ނަމާދަށްއަންނަގޮތަށް ފަތިސް ނަމާދަށްއަންނަދުވަހަކީ ޤައުމު އިޞްލާހްވާ ދުވަސްކަމަށް ފަލީލަތުއްޝައިޚް އަޙްމަދު ސަމީރު ބިން އިބްރާހިމް ވިދާޅުވެއްޖެއެވެ.
ޝައިޚް ސަމީރު މިގޮތަށް ވިދާޅުވީ ޕީސް ފައުންޑޭޝަނުން އިންތިޒާމުކޮށްގެން ރޭ ވިލިމާލޭ ފުޓުބޯޅަ ދަނޑުގައި 'ނަބިއްޔާގެ ފަހުގެ ވަސީޔަތް' މިމަޢުލޫއަށް ބޭއްވި ދަރުސްގައި ވާހަކަފުޅު ދައްކަވަމުންނެވެ.
މިދަރުސްގައި ވާހަކަފުޅު ދައްކަވަމުން ޝައިޚް ސަމީރު ވިދާޅުވީ ނަމާދު ނުކުރުމަކީ މިޤައުމުގައި އެއްވެސް މީހަކު ކަންބޮޑުވާ ކަމެއް ނޫންކަމަށާއި ނަމާދުނުކޮށްފިނަމަ އަޅާނެ ފިޔަވަޅެއްވެސް ނޯންނަކަމަށް ވިދާޅުވިއެވެ.
"ވަންވޭއެއްގެ އިދިކޮޅަށް ސައިކަލް ދުއްވައިފިއްޔާ ފިޔަވަޅު އަޅާ އެކަމަކު ނަމާދު ނުކޮށްފިއްޔާ އަޅާނެ ފިޔަވަޅެއް ނޯވޭ" ޝައިޚް ސަމީރު ވިދާޅުވިއެވެ.
ޝައިޚް ސަމީރު ވިދާޅުވީ ޤާނޫނުގައިވެސް އޮންނަނީ މިޤާނޫނުގައި ބަޔާންކޮށްފައިނެތް ކުށެއްކޮށްފިނަމަ އެއީ ކުށަކަށް ނުވާނެކަމަށް ލިޔެފައި އޮންނަކަމަށާއި އެހެންކަމުން ނަމާދު ނުކުރުން އެއީ ކުށެއްކަމަށް ނުދެކޭ ކަމަށެވެ.
ރޭގެ މިދަރުސްގައި ޝައިޚް ސަމީރު ވިދާޅުވީ ނަމާދު ނުކުރާ މީހުންނާ ދައުލަތުގެ ފަރަތުން ސުވާލު ކުރަންޖެހޭކަމަށް ވިދާޅުވެފައެވެ. އަދި ނަމަދު ނުކުރާނަމަ އަދަބު ދޭންޖެހޭނެކަމަށް ވިދާޅުވިއެވެ.
އެގޮތުން ނަމާދު ނުކުރާ މީހުންނަށް ދީނުގައި ކަނޑައަޅުއްވާފައިވާ އަދަބުތައް ޝައިޚް ސަމީރުވަނީ މިސާލުތަކާއެކު ބަޔާންކުރައްވާފައެވެ.
ކޮމެންޓް (0)
ލޯޑް ކުރަމުން...