ޤާރީކޯސް ސެޓުފިކެޓު ލެވެލް 1 އަދި 2 ކޯސްތަކަށް ވަނުމުގެ ފުރުސަތު ހުޅުވާލައިފި

ޤާރީކޯސް ސެޓުފިކެޓު ލެވެލް 1 އަދި 2 ކޯސްތަކަށް ވަނުމުގެ ފުރުސަތު ހުޅުވާލައިފިއެވެ.

ކީރިތި ޤުރްއާނާބެހޭ މަރްކަޒުން ހާމަކުރި ގޮތުގައި ޤާރީކޯސް ސެޓުފިކެޓު ލެވެލް 1 އަދި 2 ގެ ކޯސްތަކަށް ވަނުމުގެ ފުރުސަތު 12 ނޮވެންބަރު 2013 ވާ އަންގާރަ ދުވަހުން ފެށިގެން އެމަރުކަޒުން ހުޅުވާލާފައިވާކަމަށެވެ.

2 މަސް ދުވަހުގެ މުއްދަތަށް ކުރިއަށް ގެންދާ ސެޓުފިކެޓު ލެވެލް 1ގެ ކޯސްގައި 99 ކުދިންގެ ޖާގަ ލިބޭނެކަމަށް ކީރިތި ޤުރްއާނާބެހޭ މަރްކަޒުން ހާމަކުރެއެވެ. ސެޓުފިކެޓު ލެވެލް 1ގެ ކޯހުގެ ޝަރުތަކީ ފަށާތަޢުލީމު ހާސިލުކޮށްފައިވުން (ގްރޭޑް 7 ނިންމާފައިވުން) ނުވަތަ ކާތިބުކަމުގެ ސަނަދަށްވުރެ މަތީ ސަނަދެއް ހާސިލުކޮށްފައިވުން. ނުވަތަ ކީރިތި ޤުރްއާނާބެހޭ މަރްކަޒުންދޭ ޓެސްޓާއި އިންޓަވިއުއިން ފާސްވުން ކަމަށެވެ. އަދި ޤާރީކޯސް ސެޓުފިކެޓު ލެވެލް 2 ގެ ކޯހަށް 132 ޖާގަ ހުޅުވާލާފައިވާއިރު އެކޯހުގެ މުއްދަތަކީ 4 މަސް ދުވަހެވެ. މިކޯހަށް ކުރިމަތިލުމުގެ ޝަރުތަކީ ޤާރީ ކޯސް ސެޓުފިކެޓު ލެވެލް 1 ހަދާފައިވުމެވެ.

ކޯހުގައި ބައިވެރިވުމަށް އެދިލައްވާ ފަރާތްތަކުން 19 ޑިސެންބަރު 2013 ވާ ބުރާސްފަތި ދުވަހުގެ 14:00 ގެ ކުރިން ފޯމު ފުރުއްވުމަށްފަހު ލިބިފައިވާ ތަޢުލީމީ ސެޓުފިކެޓުތަކުގެ (އެކްރެޑިޓް އަދި އެޓެސްޓް ކުރެވިފައިވާ) ކޮޕީއާއި ޓްރާންސްކްރިޕްޓްގެ ކޮޕީއާއެކު ކީރިތި ޤުރުއާނާއި ބެހޭ މަރްކަޒަށް ހުށައަޅަން ޖެހެއެވެ.