ށ. ފޯކައިދޫގައި އަލަށް ބިނާކުރެވުނު މިސްކިތެއް ކަމަށްވާ މަސްޖިދުލް ނޫރު، މިއަދު ރަސްމީކޮށް ހުޅުވައިފިއެވެ. މި މިސްކިތަކީ ރަށުގެ ރައްޔިތުންނަށް ދީނީ އަޅުކަންތައް އަދާކުރުމަށް އިތުރު ފަސޭހަތަކެއް ލިބިގެންދާނެ އަގުހުރި ޚިދުމަތެއް ކަމަށް ފާހަގަކުރެވެއެވެ.
މި މިސްކިތް ރަސްމީކޮށް ހުޅުވުމުގެ ރަސްމިއްޔާތު ބޭއްވީ މިއަދު ހުކުރު ނަމާދުގެ ކުރިންނެވެ. މި ރަސްމިއްޔާތުގައި މިސްކިތް ހުޅުވައިދެއްވީ އިސްލާމީކަންތައްތަކާ ބެހޭ ވުޒާރާގެ ސްޓޭޓް މިނިސްޓަރ ޢަބްދުލްއަޒީޒް ޖަމާލް އަބޫބަކުރާއި، މި މިސްކިތް ބިނާކުރެއްވި އަލްމަރްހޫމް ޙުސައިން ވަޙީދު (ފޯކައިދޫ ވަހީދު) ގެ ދަރިކަލުން، އަޙުމަދު ނަވީން ހުސައިނެވެ. މި ރަސްމިއްޔާތުގައި ރަށުގެ ކައުންސިލްގެ އިސްވެރިންނާއި ގިނަ އަދަދެއްގެ ރައްޔިތުން ބައިވެރިވިއެވެ.
މަސްޖިދުލް ނޫރުގެ ނަމުގައި ނަންދެވިފައިވާ މި މިސްކިތަކީ އަލްމަރުހޫމް ޙުސައިން ވަހީދު (ފޯކައިދޫ ވަހީދު) ގެ ޚަރަދުގައި ބިނާކޮށްފައިވާ މިސްކިތެކެވެ. އެއްފަހަރާ 400 މީހުންނަށް ނަމާދު ކުރެވޭނެ ޖާގައިގެ ގޮތުން ފުޅާ މި މިސްކިތް ބިނާކުރުމުގެ މަސައްކަތް ނިމިފައިވަނީ ފޯކައިދޫގެ ރައްޔިތުންނަށް އޭނާ ކޮށްދެއްވި އަގުހުރި ޚިދުމަތެއްގެ ގޮތުގައެވެ. މިފަދަ ބޮޑު މިސްކިތެއް ރަށަށް ލިބުމަކީ ރަށުގެ ދީނީ މާހައުލަށް ލިބުނު ބޮޑު ކުރިއެރުމެކެވެ.
މިސްކިތް ރަސްމީކޮށް ހުޅުވުމަށްފަހު، މިއަދު ވަނީ މި މިސްކިތުގައި ފުރަތަމަ ހުކުރު ނަމާދު ކޮށްފައެވެ. މި ހުކުރު ޚުޠުބާ ދެއްވީ ޝެއިޚް އަޙްމަދު ސަމީރެވެ. މި މިސްކިތާއެކު ފޯކައިދޫގެ ރައްޔިތުންނަށް ދީނީ އަޅުކަންތައްތައް ފަސޭހަކަމާއެކު އަދާކުރުމުގެ ފުރުސަތު އިތުރުވެ، ރަށުގެ ދީނީ މާހައުލު އިތުރަށް ފުރިހަމަވެގެންދާނެ ކަމަށް ބެލެވެއެވެ.
ކޮމެންޓް (0)
ލޯޑް ކުރަމުން...