ހއ. ދިއްދޫ އިސްލާމީ މަރުކަޒުގައި އަލަށް ތަރައްޤީކުރެވުނު އިސްލާމީ ކުތުބުޚާނާ ރަސްމީކޮށް ހުޅުވައިދެއްވައިފިއެވެ. މި ކުތުބުޚާނާ ހުޅުވައިދެއްވީ އިސްލާމީކަންތައްތަކާ ބެހޭ ވުޒާރާގެ ސްޓޭޓް މިނިސްޓަރ އަބްދުﷲ ސަޢުދާންއެވެ. މިކަމުގެ ސަބަބުން ދިއްދޫގެ ރައްޔިތުންނަށް އިސްލާމީ ޢިލްމު އުނގެނުމުގެ ފުރުޞަތު އިތުރަށް ފުޅާވެގެންދާނެއެވެ.
މި މަސައްކަތަކީ ރާއްޖޭގެ އެކިކަންކޮޅުތަކުގައި އިސްލާމީ ކުތުބުޚާނާތައް ޤާއިމްކޮށް، އިސްލާމީ މަރުކަޒުތަކަށް ދިރުން ގެނެސްދިނުމަށް ރައީސުލްޖުމުހޫރިއްޔާ ޑރ. މުޙައްމަދު މުޢިއްޒުގެ ރިޔާސީ މެނިފެސްޓޯގައި ހިމެނިގެން ކުރިއަށް ގެންދާ މަސައްކަތްތަކުގެ ތެރޭގައި ހިމެނޭ މަޝްރޫޢެކެވެ. މިގޮތުން، ދިއްދޫ އިސްލާމީ މަރުކަޒުގައި ޤާއިމްކުރެވުނު މި ކުތުބުޚާނާ ވަނީ ޒަމާނީ ވަސީލަތްތައްވެސް ހިމެނޭ ގޮތަށް ތަރައްޤީކުރެވިފައެވެ.
ދިއްދޫ އިސްލާމީ ކުތުބުޚާނާގައި ދިވެހި ބަހާއި، އިނގިރޭސި ބަސް އަދި ޢަރަބި ބަހުން ލިޔެފައިވާ ތަފާތު އެކި ފޮތްތައް ބެހެއްޓިފައިވެއެވެ. މިއީ އިސްލާމީ ޢިލްމުތަކާއި، ތާރީޚާއި އަދި އެހެނިހެން ދީނީ މައުލޫމާތުތައް ފަސޭހަކަމާއެކު ހޯދާލުމަށް ލިބިގެންދާނެ ރަނގަޅު ފުރުޞަތެކެވެ.
މި ރަސްމިއްޔާތުގައި އިސްލާމީކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް އަލީ ސަޢީދުގެ އިތުރުން ރައްޔިތުންގެ މަޖިލީހުގެ ދިއްދޫ ދާއިރާގެ އިއްޒަތްތެރި މެމްބަރު ޢަބްދުއްލަޠީފް މުޙައްމަދުވެސް ވަނީ ބައިވެރިވެވަޑައިގެންފައެވެ. މިފަދަ މަޝްރޫޢުތައް ހިންގުމަކީ ރާއްޖޭގެ މުޖުތަމަޢުގައި ދީނީ ހޭލުންތެރިކަން އިތުރުކުރުމަށްޓަކައި މުހިންމު ކަމެއްކަމަށް ސަރުކާރުން ދެކެއެވެ.
advertisment
ޚިޔާލު