އިސްލާމީ ވަރުގަދަ ދައުލަތެއްގެ ގޮތުގައި ރާއްޖެ ދަމަހައްޓަން އަބަދުވެސް މަސައްކަތްކުރާނަން: ރައީސް

އިސްލާމީ ވަރުގަދަ ދައުލަތެއްގެ ގޮތުގައި އަދި އުންމަތުގެ ދިފާޢުގައި އިސްނަގާ ޤައުމެއްގެ ގޮތުގައި ދިވެހިރާއްޖެ ދެމެހެއްޓުމަށް ސަރުކާރުން އަބަދުވެސް މަސައްކަތް ކުރައްވާނެކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

ރާއްޖެ އިސްލާމްވީ ދުވަހުގެ މުނާސަބަތުގައި ފޮނުއްވި ޚިޠާބުގައި ރައީސް މުޢިއްޒު ވިދާޅުވީ، ދިވެހީންގެ ޤައުމީ ޙަޔާތަށް އެންމެ ހެޔޮ ބަދަލެއް ގެނުވި އިލާހީ ނިޢުމަތަކީ، ދިވެހި ހުރިހާ ރައްޔިތުން އިސްލާމްދީން ޤަބޫލުކޮށް، ދިވެހީންގެ އުޅުމާއި ގުޅުންތައް އެމާތް ދީނުގެ އުޞޫލުތަކުގެ މައްޗަށް އަނބުރައިލުންކަމީ ޝައްކެއް އޮތްކަމެއް ނޫންކަމަށެވެ.

މީގެ 899 އަހަރުކުރީން ރާއްޖެ އިސްލާމްވި ހާދިސާއަށް އިޝާރާތްކުރައްވަމުން ރައީސް ވިދާޅުވީ، އެދުވަހުން ފެށިގެން މިއަދާ ހަމައަށް ދިވެހިން ތިބީ ސައްތައިންސައްތަ މުސްލިމުންގެ ގޮތުގައި ކަމަށާއި، އިސްލާމްދީން ނޫން އެހެން ދީނަކަށް މި ބިމުން ޖާގަނުދީ، އިސްލާމީ އުސޫލުތަކާ ބީރައްޓެހި ކޮންމެ ކަމެއް މިފަސްގަނޑުން ލުހެލުމުގެ ސާބިތު ޢަޒުމުގައި ކަމަށެވެ.

"އިސްލާމްދީން ބިނާކޮށްދެނީ އަޚްލާޤް ރަނގަޅު ހެޔޮލަފާ އިންސާނެކެވެ. ދިވެހިރާއްޖޭގެ ކަންކަން ހެޔޮ މަގުން ހިންގުމުގައި ސަރުކާރުން އެންމެ އިސްކަންދޭ އެއް ސިޔާސަތަކީ، ޢުމްރާނީ ތަރައްޤީ ޤައުމަށް ގެންނަ ފަދައިން، ލަފާދާރު ދިވެހި ރައްޔިތެއް ބިނާކުރުމެވެ،" ރައީސް މުޢިއްޒު ވިދާޅުވިއެވެ.

ރައީސްގެ ޚިޠާބުގައި، ދިވެހިރާއްޖެ އިސްލާމްވުމަށް މެދުވެރިކުރެއްވި ޢިލްމުވެރިޔާ އަބުލްބަރަކާތު ޔޫސުފުލް ބަރުބަރީއާއި، އެ ދުވަހުން ފެށިގެން މިއަދާ ހަމަޔަށް އިސްލާމްދީނުގެ ޝިޢާރުތައް މިދީބުގައި ނެގެހެއްޓެވި އެންމެހާ ބޭފުޅުންގެ ޛިކުރާ އައުކުރައްވައި، އެ ބޭފުޅުންނަށް ދުޢާ ކުރެއްވިއެވެ.

ވޭތުވެދިޔަ 9 ޤަރުނުގެ ތެރޭގައި ދިވެހީންނަކީ މެހުމާނުންނަށް ކަމޭހިތާ، އަމާންކަމާއި ހަމަޖެހުން ނަގަހައްޓާ، ސާފުތާހިރު، އުޅުންހުރި، ގޮތްހުރި ބައެއްގެ ގޮތުގައި ބޭރުގެ މުއައްރިޚުން ފާހަގަކޮށްފައިވާކަން ރައީސް ފާހަގަކުރެއްވިއެވެ. އަދި ރާއްޖޭގެ ރީތިކަމާއި ހިތްގައިމުކަން ދެވަނައެއް ނެތް މިސާލަކަށް ވެފައިވަނީ ދިވެހީންގެ އިސްލާމީ އަޚްލާޤާއި ރީތި ސިފަތަކާ އެކުގައިކަމަށްވެސް ވިދާޅުވިއެވެ.