ހެޔޮ ބިންގާ ޖަމްޢިއްޔާ އަދި އިސްލާމީކަންތައްތަކާ ބެހޭ ވުޒާރާ ގުޅިގެން ކުޑަކުދިންނަށް އަމާޒުކޮށް "އެހީވާނީ ކާކު؟" މި މަޢުޟޫޢުގެ ދަށުން ޚާއްސަ ޕްރޮގުރާމެއް ކުރިއަށް ގެންގޮސްފިއެވެ.
މި ޕްރޮގުރާމު ކުރިއަށް ގެންދެވުނީ އައްޝައިޚް ޖައުފަރު ފާއިޒްގެ އިރުޝާދުގެ ދަށުންނެވެ. ޕްރޮގުރާމުގައި މައިގަނޑު ގޮތެއްގައި އަލިއަޅުވާލާފައިވަނީ ކުޑަކުދިންގެ މެދުގައި އެކަކު އަނެކަކަށް އެހީތެރިވުމުގެ މުހިންމުކަމުގެ މައްޗަށެވެ.
ޕްރޮގުރާމުގައި މައިންބަފައިންގެ އިތުރުން ކުދިން އެއްކުއްޖަކު އަނެއް ކުއްޖަކަށް އެހީތެރިވާންޖެހޭ މުހިންމުކަމާއި، ކުދިން ހިތްހަމަނުޖެހޭ ކަންކަން ކޮށްގެން ނުވާނެކަން ޝައިޚް ޖައުފަރު ވަނީ ފާހަގަކުރައްވާފައެވެ. އަދި މީގެއިތުރުން ރަސޫލާ ޞައްލަﷲ ޢަލައިހި ވަސައްލަމައާއި ޞަޙާބީންގެ ދިރިއުޅުމުން އެހީތެރިކަމުގެ ރިވެތި ނަމޫނާތައް ވަނީ ހިއްސާކުރައްވާފައެވެ.
މި ޕްރޮގުރާމުގައި ގިނަ އަދަދެއްގެ ކުޑަކުދިން ބައިވެރިވެފައިވާކަން ފާހަގަކުރެވުނެވެ. އަދި ކުދިންނަށް އެހީތެރިވުމުގައި އަމަލީގޮތުން ކުރެވިދާނެ ކަންތައްތަކާ ބެހޭގޮތުން މަޢުލޫމާތު ދެވުނެވެ.
މިފަދަ ޕްރޮގުރާމުތަކަކީ ކުޑަކުދިންގެ މެދުގައި އިޖްތިމާޢީ ގުޅުން ބަދަހިކޮށް، އިސްލާމީ ރިވެތި އަޚްލާޤު އަށަގެންނެވުމަށް މުހިންމު ދައުރެއް އަދާކުރާނެ ކަމެއް ކަމުގައި ބެލެވެއެވެ.
ކޮމެންޓް (0)
ލޯޑް ކުރަމުން...