ހޮނިހިރު ދުވަހުގެ ރޭ ބޭއްވުނު ޚާއްސަ ރަސްމިއްޔާތެއްގައި އިސްލާމީ ކުތުބުޚާނާ ހުޅުވިގެން ދިއުމަކީ ރާއްޖޭގައި ދީނީ ޢިލްމަށާއި ދިރާސާތަކަށް ލިބިގެން ދިޔަ ވަރަށް ބޮޑު ކުރިއެރުމެކެވެ. ގިނަ ދުވަސްތަކަކަށްފަހު އިސްލާމީ ކުތުބުޚާނާ އަލުން ހުޅުވިގެން ދިއުމާއެކު ގިނަ ފައިދާތަކެއް ލިބިގެންދާނެ ކަމަށް ޢާންމުން ވަނީ ޝުޢޫރު ފާޅުކޮށްފައެވެ.
ކުތުބުޚާނާ ހުޅުވުމަށް ބޭއްވުނު ރަސްމިއްޔާތަށްފަހު އިސްލާމިކް މިނިސްޓްރީއަށް ދެއްވި ބަސްދީގަތުމެއްގައި ރާއްޖޭގެ މަޝްހޫރު ދީނީ އިލްމުވެރިޔާ ޝައިޚް އަޙްމަދު ސަމީރު އިސްލާމީ ކުތުބުޚާނާ ޞިފަކުރެއްވީ ރާއްޖޭގެ ޢިލްމީ ޖީލު އުފެއްދުމުގައި މުހިންމު ދައުރެއް އަދާކުރާނެ މަރުކަޒެއްގެ ގޮތުގައެވެ. އެގޮތުން ކުރިން އިސްލާމީ މަރުކަޒުގައި ހުރި ކުތުބުޚާނާއަކީ ވެސް ޒުވާނުންގެ މެދުގައި ޢިލްމީ ބަހުސްތަކާއި ދިރާސާތައް ކުރެވިފައިވާ ތަނެއްކަމަށް ޝެއިޚް ވިދާޅުވިއެވެ. އަދި ފޮތް ކިޔުމުގެ ޢަމަލީ ތަޖުރިބާއަކީ ޑިޖިޓަލް ވަސީލަތްތަކުން ލިބޭ ތަޖުރިބާއާ ތަފާތު، ޚާއްސަ އިޙްސާސްތަކެއް ލިބިދޭ ކަމެއްކަމަށް ފާހަގަކުރައްވާ ޒުވާނުންނާއި ޢިލްމީ ބޭފުޅުން ކުތުބުޚާނާއަށް ދިއުމަށް ޝައިޚް ބާރުއެޅުއްވިއެވެ.
މި ކުތުބުޚާނާގައި ދިރާސާކުރުމަށް ވަރަށް ރަނގަޅު މާޙައުލެއް ޤާއިމުކުރެވިފައިވާކަމަށް އެހެން ބޭފުޅަކު ފާހަގަކުރެއްވިއެވެ. އެގޮތުން މި ކުތުބުޚާނާގައި ޢަރަބި ބަހާއި އެހެނިހެން ބަސްބަހުން ލިޔެފައިވާ ފޮތްތައް ލިބެން ހުންނާނެއެވެ. މީގެ އިތުރުން، އޮންލައިން ލައިބްރަރީގެ ޚިދުމަތާއި، ކޮމްޕިއުޓަރ ސިސްޓަމް އަދި ފޮޓޯކޮޕީ ނެގުމުގެ ޚިދުމަތްވެސް ލިބެން ހުންނާނެއެވެ.
ކުރީގެ އިސްލާމީ ކުތުބުޚާނާގެ މެންބަރެއް ފާހަގަކުރެއްވި ގޮތުގައި، އިސްލާމީ ކުތުބުޚާނާ ހުޅުވިގެންދިޔުމަކީ ފޮތަށް ލޯބިކުރާ މީހެއްގެ ހައިސިއްޔަތުން ލިބިގެންދިޔަ ވަރަށް ބޮޑު އުފަލެކެވެ. އަދި ރާއްޖޭގެ ހުރިހާ ސަރަޙައްދެއްގައި އިސްލާމީ ކުތުބުޚާނާތައް ހުޅުވިގެންދިޔުމަކީ ރާއްޖޭގެ ޢިލްމީ ތާރީޚަށް ލިބޭނެ ވަރަށް މުހިންމު ކުރިއެރުމެއްކަމަށް ވެސް އެބޭފުޅާ ވިދާޅުވިއެވެ. އަދި ދިވެހި ޒުވާނުން މި ލައިބްރަރީތަކުގެ ބޭނުން ހިފުމަށް ބާރުއަޅުއްވަވައި ރާއްޖޭގެ ޢިލްމީ ކުރިއެރުމަށް މި ލައިބްރަރީތަކުގެ ދައުރު އަބަދުމެ ފާހަގަކުރެވިގެންދާނެކަމަށް އުންމީދުކުރައްވާކަމަށް ވެސް ވިދާޅުވިއެވެ.
ސަލްމާން މިސްކިތުގެ ތިންވަނަ ފަންގިފިލާގައި ހުޅުވިގެން ދިޔަ އިސްލާމީ ކުތުބުޚާނާ ވަނީ ޒަމާނީ ފެންވަރަށް ތަރައްޤީކޮށް، ބޭނުންކުރާ ފަރާތްތަކަށް ހިތްގައިމު މާޙައުލަކާއިއެކު ހުޅުވާލެވިފައެވެ. މި ކުތުބުޚާނާގައި މިހާރުވެސް 15,000 އަށްވުރެ ގިނަ ފޮތް ހުރިކަން ފާހަގަކުރެވެއެވެ.
ކޮމެންޓް (0)
ލޯޑް ކުރަމުން...