މަރާމާތު ކުރުމަށްޓަކައި މީގެ 11 މަސް ކުރިން ބަންދުކުރެވިފައިވާ ހުކުރު މިސްކިތް ހުޅުވުމުގެ މަސައްކަތް ކުރެވެމުންދާ ކަމަށް މިނިސްޓްރީ އޮފް އާޓްސް، ކަލްޗާ އެންޑް ހެރިޓޭޖުން ވިދާޅުވެއްޖެއެވެ.
މިގޮތުން، މިނިސްޓްރީން ވިދާޅުވެފައިވާ ގޮތުގައި އެބޭފުޅުން މަސައްކަތް ކުރައްވަމުން ގެންދަވަނީ މިފެށޭ ހަފްތާގައި މިސްކިތް ހުޅުވަން ކަމަށާއި، އެކަމުގެ ތައްޔާރީތައް މިހާރު ވަމުންދާ ކަމަށެވެ. އަދި މިހާރު މިސްކިތުގެ ކާޕެޓް ބަދަލުކޮށް ނެވިލޯން އަޅާ ކަތުރުފަނީގެ މައްސަލަވެސް ވަނީ ހައްލުކޮށްފައިކަމަށްވެސް އެބޭފުޅުން ވިދާޅުވެފައިވެއެވެ.
2019 ވަނަ އަހަރުގެ ސެޕްޓެމްބަރު މަހުގެ 13 ވަނަ ދުވަހު ހުކުރު މިސްކިތް ބަންދު ކުރެވިފައިވަނީ އެ މިސްކިތް ބޭނުންކުރާ މީހުންގެ ސަލާމަތާއި ރައްކާތެރިކަމަށް ބުނެ އެވެ. އޭރު އެދުވަހުގެ ހުކުރު ނަމާދަށް އެތައް ބަޔަކު ގޮސް ތިއްބެވެ. މިސްކިތުން މީހުން ނެރެން މަސައްކަތް ކުރެވުމުން، ބައެއް ބޭފުޅުން އެދުވަހު މިސްކިތުން ނިކުންނެވުމަށް ދެކޮޅު ހައްދަވާ، މިސްކިތުން ނިކުންނެވީ ހުކުރު ނަމާދު ކުރެއްވުމަށް ފަހުއެވެ.
މިދިޔަ މާރޗް މަހު ރައްޔިތުންގެ މަޖިލީހުގެ ގައުމީ ތަރައްގީއާއި ތަރިކައިގެ ކޮމިޓީގައި ވާހަކަދައްކަވަމުން ހެރިޓޭޖް މިނިސްޓްރީގެ ސްޓޭޓް މިނިސްޓަރު މުހައްމަދު ޠާރިގް ވިދާޅުވެފައިވާ ގޮތުގައި ލޮކްޑައުންއަށްފަހު އެހެން މިސްކިތްތައް ހުޅުވާއިރު، ހުކުރު މިސްކިތް ހުޅުވުމުގެ މަސައްކަތް ދަނީ ކުރެވެމުންނެވެ. އެދުވަހު ވާހަކަފުޅު ދައްކަވަމުން ސްޓޭޓް މިނިސްޓަރ ޠާރިޤު ވިދާޅުވެފައިވާ ގޮތުގައި ހުކުރު މިސްކިތް އާބާތުރަ ފިލުވުމަށް ވަނީ މަސައްކަތް ކުރަން ޖެހިފައެވެ. އަދި އެ މަސައްކަތް ކުރާނީ އިންޑިއާ ސަރުކާރުގެ އެހީގައި ކަމަށްވެސް އޭނާ ވިދާޅުވެފައިވެއެވެ.
ކޮމެންޓް (0)
ލޯޑް ކުރަމުން...