ސައުދީ އަރަބިއްޔާ އިން ކޮވިޑު-19 ޖެހުނު މީހުންގެ އަދަދު 511 އަށް އަރައިފިއެވެ.
ސައުދީ އަރަބިއްޔާގެ ހެލްތު މިނިސްޓްރީން ހާމަކުރި ގޮތުގައި ފާއިތުވި 24 ގަޑި އިރުތެރޭ 119 މީހުންނަށް ކޮވިޑު-19 ވަނީ ޖެހިފައެވެ.
ގަލްފުގެ 6 ގައުމެއްގައި ކޮވިޑު-19 ފެތުރިފައިވާއިރު ޖުމްލަ 1700 މީހުންނަށްވަނީ މިބަލި ޖެހިފައެވެ. އަދި ގަލްފުގައި މިހާތަނަށް 4 މީހަކުވަނީ މިބަލީގައި މަރުވެފައެވެ.
މައްކާގެ ހޮޓަލެއްގައި ތިބި މީހުންގެ ތެރެއިން 72 މީހަކު ކޮވިޑް- 19 އަށް އިއްޔެ ވަނީ ފައްސިވެފައެވެ. ސައޫދީ ހެލްތު މިނިސްޓްރީއާ ހަވާލާދީ އެގައުމުގެ ނޫސްތަކުން ބުނެފައިވާ ގޮތުގައި ޕޮޒިޓިވްވީ އެންމެންނަކީ ވެސް ތުރުކީ މީހުންނެވެ. އެ އެންމެންނަށްވެސް ކޮވިޑު-19 ޖެހިފައިވަނީ އެކަކުގެ ކިބައިންކަމަށް ލަފާކުރެވޭކަމަށް އެގައުމުގެ ނޫސްތަކުން ރިޕޯޓްކޮށްފައިވެއެވެއެވެ.
ހެލްތު މިނިސްޓްރީގެ ރަސްމީ ތަރުޖަމާނު ވިދާޅުވެފައި ވަނީ މި އެންމެންނަށް ކޮވިޑް- 19 ޖެހިފައިވާކަން އެނގުނީ ކުރިން އެތަނުގައި ހުރި މީހަކު ވައިރަހަށް ފައްސިވުމާ ގުޅިގެން އެތަނުގައި ތިބި އެންމެެން ޓެސްޓުކުރުމުންނެވެ. ފައްސިވި އެެއްވެސް މީހެއްގެ ކިބައިން ކޮވިޑް- 19 ގެ އަލާމާތެއްް ފެނިފައި ނުވެއެވެ.
ކޮވިޑު-19 އާއި ގުޅިގެން ސައުދީ އަރަބިއްޔާއިން ވަނީ އުމްރާގެ އަޅުކަންވެސް ވަގުތީ ގޮތުން ހުއްޓާލާ ހުރިހާ މިސްކިތްތަކެއްގައި ނަމާދު ކުރުން ވަގުތީ ގޮތުން ހުއްޓާލާފައެވެ.
އެ ގައުމުގެ ހެލްތު މިިނިސްޓްރީން ހާމަކުރި ގޮތުގައި އެގައުމުގައި މިހާތަނަށް 23 ހާސް މީހުން ކޮވިޑް- 19 އަށް ޓެސްޓުކޮށްފައި ވެއެވެ.
ޚިޔާލު