ޝަހީދުވުމުގެ އެއްދުވަސް ކުރިން ސީރިޔާގެ ޒުވާނަކު ލިޔެފައިވާ އަސަރުގަދަ ސިޓީ

މުޙައްމަދު ޢަބްދުއްލަޠީފް އަލްޢަލްވާ އަށް އޭނާ ޝަހީދުކޮށްލެވޭނެކަމުގެ އިޙްސާސްތަކެއް ވީ ކަންނޭނގެއެވެ. ބައްޝާރުލްއަސަދުގެ ލަޝްކަރުތަކުން އޭނާ ޤަތުލުކޮށްލުމުގެ އެއްދުވަސްކުރިން އޭނާގެ އަތުން ސިޓީ އެއް ނުވަތަ އުއްމަތުގެ މައްޗަށް ވަޞިއްޔަތެއް ލިޔުނެވެ. އޭނާގެ ސިޓީގެ ދިވެހި ތަރުޖަމާ ތިރީގައި އެވަނީއެވެ.

ރަޙްމާން ވަންތަ، ރަޙީމްވަންތަ ﷲ ގެ އިސްމުފުޅުން ފަށަމެވެ.

ﷲ ގަންދީ ބުނަމެވެ. މި ހިނގާ ޙަރަކާތްތައް ފެށުމަށް ފަހު އަހަރެންގެ ލޮލުން ކަރުނައެއް ނާދެއެވެ. އެއީ އަހަރެންގެ ފޮޓޯތަކާއި އެއްކޮށްފައި ހުރި ހަނދާނީ ތަކެތި ފޮރުވަން އަހަރެން އުޅެން ޖެހުމާ ހަމައަށެވެ. އަހަރެންގެ ހަނދާންކުރާނެ މީހުންގެ ކިބައިން އަހަރެން އެދެނީ އެމީހުން އަހަރެންނަށްޓަކާ، އަދި މުޙައްމަދުގެފާނުގެ އުއްމަތަށްޓަކާ ދުޢާކޮށްދިނުމަށެވެ. އަދި އެމީހުން ﷲގެ ރަސޫލާ މުޙައްމަދު (ޞައްލަﷲ ޢަލައިހި ވަސައްލަމް) ގެ އަރިހު، އަހަރެމެންނަކީ ހަމައެކަނި އިސްލާމްދީނުގެ ދިދަ ނެގެހެއްޓުން ފިޔަވާ އެހެންކަމަކަށް ނޭދޭ މުސްލިމުންކަން ދަންނަވާދިނުމަށެވެ.

މާތް ﷲ ސުބުޙާނަހޫ ވަތަޢާލާ ކަލޭގެފާނުގެ މައްޗަށް ޞަލަވާތް ލައްވާށިއެވެ، އޭ އަހަރެންގެ ޙަބީބް، އޭ ﷲގެ ރަސޫލާއެވެ! ހިސާބުބައްލަވާ ދުވަހުން ކަލޭގެފާނުގެ ޝަފާޢަތަށް އަހަރެމެން އެދެމުއެވެ. އަދި އެކަމަށް އެދި ﷲ ގެ ޙަޞްރަތުން ދުޢާކުރަމުއެވެ. ﷲ ގަންދީ ބުނަމެވެ. މިސިޓީ ކިޔާ ކޮންމެ މީހަކު އޭނާގެ މުޅި ޢުމުރު އިސްލާމްދީނަށް ޚިދުމަތްކުރުމުގައި އެއްވެސް ކަންދެއްކުމެއް ބޮޑާ ވުމެއް ނެތި ހޭދަކުރުމަކީ މިސިޓީ ކިޔާ ކޮންމެ މީހަކަށްވާ މަސްޢޫލިއްޔަތެކެވެ.

ހަމަކަށަވަރުން ﷲގެ ރަސޫލާ (ޞައްލަﷲ ޢަލައިހި ވަސައްލަމް) މިފަދައިން ޙަދީޘްކުރެއްވި ހިނދު ތެދު ޙަދީޘްކުރެއްވިއެވެ: "އިސްލާމްދީން ފެށުނީ ބީރައްޓެހި ގޮތުގައެވެ. އަދި އެދީން އެނބުރިދާނީ ބީރައްޓެހި ގޮތުގައެވެ."

ނުހަނު ބޭނުންޖެހިފައިވާ، ﷲގެ އަޅާ
މުޙައްމަދު ޢަބްދުއްލަޠީފް އަލްޢަލްވާ

ﷲ ފިޔަވާ ޙައްޤުވެގެން އަޅުކަމެއް ވެވޭ އިލާހަކު ނުވެއެވެ. އަދި މުޙައްމަދުގެފާނީ ﷲގެ ރަސޫލާއެވެ.