ށ. ފުނަދޫގައި އިމާރާތްކުރުމަށް ހަމަޖެހިފައިވާ އިސްލާމީ މަރުކަޒުގެ އިމާރާތް ކުރުމުގެ އެއްބަސްވުމުގައި މިއަދު ސޮއިކުރެވިއްޖެއެވެ.
މި އެއްބަސްވުމުގައި ސޮއިކުރެއްވީ އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް އަލީ ސަޢީދުއާއި، ނޫރައްދީން އިންވެސްޓްމަންޓްގެ ފަރާތުން އެ ކުންފުނީގެ މެނޭޖަރ ޒުރައިރަތު އާދަމްއެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ށ. އަތޮޅަށް ކުރައްވަމުން ގެންދަވާ ދަތުރުފުޅުގެ ތެރެއިން، ށ. ފުނަދޫ ރައްޔިތުންނާ ބައްދަލުކުރެއްވުމަށް ބޭއްވި ޖަލްސާގައި މި އެއްބަސްވުމުގައި ސޮއިކުރެވުނެވެ.
އިސްލާމީ މަރުކަޒުގެ އިމާރާތުގެ މަސައްކަތް ނިމުމުން، މި މަރުކަޒުގައި ނަމާދުކުރާ ބައިގެ އިތުރުން ކޮންފަރެންސް ހޯލެއް، ލައިބްރަރީއެއް، ކްލާސްރޫމްތަކެއް، އިމާމު ރޫމެއް އަދި އޮފީސް ބައެއް ހިމެނޭނެކަމަށް މަޢުލޫމާތު ލިބިފައިވެއެވެ. އަދި މީގެ އިތުރުން މި އިމާރާތުގައި ސޯލާ ޕެނަލްތައް ހަރުކުރެވި، އޭސީ ސިސްޓަމްވެސް ޤާއިމްކުރެވޭނެއެވެ.
މި މަޝްރޫޢަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ރިޔާސީ ވަޢުދުތަކުގެ ތެރެއިން ވަޢުދެއް ފުއްދުމުގެ ގޮތުން ކުރިއަށް ގެންދެވޭ މަޝްރޫޢެކެވެ. މި މަޝްރޫޢު ނިމުމުން ށ. ފުނަދޫގެ ރައްޔިތުންނަށް ޒަމާނީ ފެންވަރުގެ އިސްލާމީ މަރުކަޒެއްގެ ޚިދުމަތް ލިބިގެންދާނެއެވެ.
ކޮމެންޓް (0)
ލޯޑް ކުރަމުން...