ސަޢުދި ޢަރަބިއްޔާގެ ބޮޑެތި ދަންނަބޭކަލުންގެ މަޖިލީހުގެ ރައީސް އަދި އެ ޤައުމުގެ އެންމެ މަތީ މުފްތީ، ސަމާޙަތުއްޝައިޚް ޢަބްދުލްޢަޒީޒު ބިން ޢަބްދުﷲ އާލް ޝައިޚް އަވަހާރަވުމާއި ގުޅިގެން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ތަޢުޒިޔާ ވިދާޅުވެއްޖެއެވެ.
ސޯޝަލް މީޑިއާގައި ހިއްސާކުރެއްވި މެސެޖެއްގައި ރައީސުލްޖުމްހޫރިއްޔާ ވިދާޅުވެފައިވަނީ، މި ޚަބަރު އަޑުއެއްސެވީ ފުން ހިތާމައާއެކު ކަމަށާއި، އެމަނިކުފާނުގެ ފުރާނަފުޅު ޖަންނަތުލްފިރުދައުސްގައި ލެއްވުން އެދި ދުޢާ ކުރައްވާ ކަމަށެވެ. މީގެއިތުރުން، މާތްވެގެންވާ ދެ ޙަރަމްގެ ޚާދިމް، ސައުދީގެ ރަސްގެފާނު ސަލްމާން ބިން ޢަބްދުލްޢަޒީޒް އާލް ސައުދަށާއި ވަލީއަހުދު މުޙައްމަދު ބިން ސަލްމާން އަދި މަރުޙޫމްގެ އާއިލާއަށް ތަޢުޒިޔާ ވިދާޅުވެފައިވެއެވެ.
ރައީސުލްޖުމްހޫރިއްޔާ ފާހަގަކުރެއްވި ގޮތުގައި، ސަޢުދީއަށް ގެއްލުނީ އިސްލާމްދީން ފެތުރުމުގައި ގިނަ މަސައްކަތްތަކެއް ކުރައްވާފައިވާ، ދީނަށް ނުހަނު ޚިދުމަތްތެރި ޢިލްމުވެރި ބޭފުޅެކެވެ.
ރައީސުލްޖުމްހޫރިއްޔާގެ ނައިބު އަލްއުސްތާޛް ހުސައިން މުޙައްމަދު ލަތީފްވެސް ވަނީ ތަޢުޒިޔާ ވިދާޅުވެ، މަރުޙޫމްގެ ފުރާނަފުޅަށް ރަހުމަތް ލައްވައި ސުވަރުގޭގެ މަތިވެރި ނިޢުމަތުގައި ލެއްވުން އެދި ދުޢާ ކުރައްވާ ކަމަށް ވިދާޅުވެފައެވެ.
އިސްލާމީ ކަންތައްތަކާބެހޭ ވަޒީރު ޑރ. މުޙައްމަދު ޝަހީމް އަލީ ސަޢީދު ވިދާޅުވެފައިވަނީ، މަރުޙޫމަކީ އެތައް އަހަރެއް ވަންދެން ޢަރަފާތުގެ މާތް ބިމުގައި ޙައްޖުގެ ޚުޠުބާ ދެއްވާފައިވާ ބޭފުޅެއް ކަމަށެވެ. އަދި މަރުޙޫމްގެ މައްޗަށް ޣައިބުގައި ރާއްޖޭގައި ކުރެވޭ ކަށުނަމާދު އޮންނާނީ މިރޭ އިޝާ ނަމާދަށް ފަހު އިސްލާމީ މަރުކަޒުގައި ކަމަށް އިޢުލާން ކުރައްވާފައިވެއެވެ.
advertisment
ޚިޔާލު