ތަމްވީލް އިމްޕެކްޓް ޕިޗް ޗެލެންޖް: 1ލައްކަ ރުފިޔާއާއި ހަމައަށް އިސްލާމިކް ފައިނޭންސް ފަންޑިންގ

މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ތަމްވީލް އިމްޕެކްޓް ޕިޗް ޗެލެންޖްގެ ނަމުގައި އައު މުބާރާތެއް އިޢުލާނުކޮށްފިއެވެ. މާލީ ހޭލުންތެރިކަމާއި އިސްލާމީ ފައިނޭންސްގެ ދާއިރާ ކުރިއެރުވުމަށް އަމާޒުކޮށްގެން ބާއްވާ މި މުބާރާތުގައި ރާއްޖެއާއި ރާއްޖެއިން ބޭރުގެ ފަރާތްތަކަށް ބައިވެރިވުމުގެ ފުރުސަތު ހުޅުވާލާފައިވެއެވެ.

މި މުބާރާތަކީ ދުޅަހެޔޮ މާލީ ނިޒާމަކާއި ދެމެހެއްޓެނިވި އިޤްތިޞާދީ ތަރައްޤީގެ ޒަރީޢާއިން މުޖުތަމަޢުތައް ބާރުވެރިކުރުވުމަށް އެމްއެމްއޭއިން ފަށާފައިވާ ތަމްވީލް ފިންލެޓް ފެސްޓިވަލްގެ ބައެކެވެ. މި ފެސްޓިވަލްގައި އިމްޕެކްޓް ޕިޗް ޗެލެންޖުގެ އިތުރުން ފިންލެޓް ޗެލެންޖް، އިކޮންކުއެސްޓް ބަހުސް މުބާރާތް، ފިއުޗަރ ފައިނޭންސް މަޒުމޫނު މުބާރާތް، ވެލިއުސް އެންޑް ވިޝަން އާޓް މުބާރާތް އަދި ކުރު ވީޑިއޯ މުބާރާތް ހިމެނެއެވެ

މުބާރާތް ބެހިގެންވަނީ ދެ ގިންތިއަކަށެވެ. ފުރަތަމަ ގިންތި އަމާޒުކޮށްފައިވަނީ އިސްލާމީ ފައިނޭންސިންގ އަށް އައު ހައްލުތަކާ ގުޅޭގޮތުންނެވެ. މި ގިންތި ޚާއްޞަކޮށްފައިވަނީ ޒުވާނުންނާއި، ސްޓާޓްއަޕްތަކާއި، ދަރިވަރުންނާއި، މުދައްރިސުންނާއި އަދި އިޖްތިމާޢީ ވިޔަފާރިވެރިންނަށެވެ. މި ގިންތީގައި ކާމިޔާބުކުރާ ފަރާތްތަކަށް 30,000 ރުފިޔާއާ ހަމައަށް ފައިސާގެ އިނާމުގެ އިތުރުން ފަންޑިންގ އަދި މެންޓަރޝިޕް ފުރުޞަތުތައް ލިބިދެވޭނެއެވެ.

ދެވަނަ ގިންތި އަމާޒުކޮށްފައިވަނީ "ދިރާސާއާއި ސިޔާސަތުގެ އަލީގައި ވަށައިޖެހޭ އިސްލާމިކް ފައިނޭންސް ނިޒާމެއް" މި މަޢުޟޫއަށެވެ. މި ބައި އަމާޒުކުރެވިފައިވަނީ ދިރާސާކުރާ ފަރާތްތަކާއި، ދާއިރާގެ ފަންނީ ތަޖުރިބާކާރުންނާއި އަދި މުއައްސަސާތަކަށެވެ. މި ގިންތީގައި ބައިވެރިވާ ފަރާތްތައް ވާދަކުރާނީ 100,000 ރުފިޔާގެ ފަންޑަކަށެވެ.

މުބާރާތުގައި 18 އަހަރުން މަތީގެ ވަކިވަކި ފަރުދުންނާއި 3 މެންބަރުންގެ ޓީމްތަކަށް ބައިވެރިވެވޭނެއެވެ. ނަމަވެސް އެމްއެމްއޭގެ މުވައްޒަފުންނާއި ޕާޓްނަރުންނަކަށް މުބާރާތުގައި ބައިވެރިއެއް ނުވެވޭނެއެވެ.