ހއ ދިއްދޫ ކައުންސިލްގެ ރައީސް އަލީ ހާޝިމް ލާދީނީ ކަންކަމަށް ތާއީދުކުރާ ކަމަށްބުނެ އޭނާގެ މައްޗަށް އިތުބާރު ނެތްކަމަށް ފާސްކޮށް މަޤާމުން ވަކިކޮށްދިނުމަށް އިލްތިމާސް ކުރުމަށް ޕެޓިޝަނެއްގައި ސޮއިކުރަން ފަށައިފިއެވެ.
ހުސައިން ސިމާން ކިޔާ ފަރާތަކުން ފޭސްބުކްގައި އާއްމުކޮށްފައިވާ މިޕެޓިޝަނުގައި ބުނެފައިވަނީ އިސްލާމްދީނާއި ރަސޫލާ ޞައްލަﷲ އަލައިހި ވަސައްލަމައަށާއި އެކަލޭގެފާނުގެ އަޞްހާބުންނަށް ފުރައްސާރަކޮށް ސޯޝަލް މީޑިއާގައި ދައްކަމުންދާ ވާހަކަތަކަށް ދިއްދޫ ކައުންސިލްގެ ރައީސް އަލީ ހާޝިމް ހިތްވަރުދީ، އެމީހުންގެ ދިފާއުގައި ޝޯޝަލް މީޑިއާފަދަ ޕެލްޓްފޯމްތަކުގައި ވާހަކަދައްކައި، އެމީހުންނަކީ މޮޅު ބައެއްކަމަށާއި އެމީހުން އެދައްކާ ވާހަކަތަކަކީ ރަނގަޅު ވާހަކަތަކެއް ކަމަށް ބުނަމުން ގެންދާކަމަށެވެ. އަދި މި ކަމަކީ ދިއްދޫ ރައްޔިތުންގެ ހިތްތަކުގައި މާތްވެގެންވާ އިސްލާމް ދީނަށް އޮތް ލޯތްބާއި އިޙްތިރާމަށް ނުބަލައި ރަށުގެ ރައްޔިތުން ބަދުނާމު ކުރުމުގެ އަމަލެއްކަމުގައި ދެކޭ ކަމަށާއި ދިވެހީންގެ އެއްބައިވަންތަކަމުގެ އަޞްލުކަމުގައިވާ މާތްވެގެންވާ އިސްލާމްދީނަށް ނަޞްރު ދިނުމަކީ ކޮންމެ މުސްލިމެއްގެ މައްޗަށް އޮތް ވާޖިބަކަށް ވީހިނދު މިފަދަ ހައްސާސް މައްސަލައެއްގައި، ދިއްދޫ ކައުންސިލުގެ ރައީސްކަން ކުރައްވާ ބޭފުޅަކު މިފަދަ ގޮތަކަށް އާއްމުންގެ ތެރޭގައި ފިތުނަވެރިކަން އުފެދޭނެ ވާހަކަތަކެއް ދައްކާފައިވާކަމީ އެއްވެސް ހާލަތެއްގައި ބަލައިގަނެވޭނެ ކަމެއްނޫނެވެ.
އެގޮތުން އަލީ ހާޝިމް ކޮށްފައިވާ މިއަމަލުގެ ސަބަބުން، ދިއްދޫ ކައުންސިލްގެ ރައީސްގެ މަޤާމުގައި އިތުރަށް ހުރުން އެއީ އެއްވެސް މިންވަރަކަށް ދިއްދޫ ރައްޔިތުން ބޭނުންވާނެކަމެއް ނޫންކަމުގައި ފާހަގަކުރާ ކަމަށާއި އެހެންކަމުން އަލީ ޙާޝިމްގެ އިތުބާރު ނެތްކަމުގެ މައްސަލަ ހުށައަޅައި އެބޭފުޅާގެ އިތުބާރު ނެތްކަމަށް ފާސްކޮށްދެއްވުން އެދި ކައުންސިލްގައި ދެން ހިމެނިވަޑައިގެންނަވާ 04 މެމްބަރުންނަށް އިލްތިމާސްކުރާ ކަމަށް މިޕެޓިޝަނުގައި ބުނެފައިވެއެވެ.
އިސްލާމްދީނުގެ ޙުކުމްތަކާއި ރަސޫލާއާއި ގުޅޭގޮތުން މަންދު ކޮލެޖުގެ ވެރިޔާ އިބްރާހިމް އިސްމާއިލް (އިބްރާ) ދައްކަމުންދާ ވާހަކަތަކަށް ދީނީ ޢިލްމުވެރިންނާއި އާއްމުންގެ ނުރުހުން އަމާޒުވެފައިވަނިކޮށް އިބްރާއާއެކު ހުރި ކަމަށްބުނެ އަލީ ހާޝިމް ކޮށްފައިވާ ޓުވީޓުގެ ޚަބަރު ވަގުތު ނޫހުން ގެނެސްދީފައިވަނީ އޮޅުވާލައިގެން ކަމުގައި އަލީ ހާޝިމްވަނީ ބުނެފައެވެ.
ކޮމެންޓް (0)
ލޯޑް ކުރަމުން...